மகள் பட்டாம் பூச்சி

மென்பனியை உருக்கும் பொன்வெயிலில்
கீழிறங்கும் வண்ணக்காகித க்ளைடராய்
தொட்டுத் தொட்டு விளையாண்ட
தோட்டத்துப் பட்டாம்பூச்சிகள் எங்கே போயிருக்கும்
பூண்டுச் செடிகள் பிடிங்கி துரத்திப்பிடிக்க
ஓடிய குழந்தைகளின்
டிவிப்பொட்டிக்குள் மறைந்திருக்கலாம்

பாவனை பட்டாம்பூச்சிகள் இந்த கவிதையைப்போலவே
எங்கேனும் இருந்திடலாம் என்றெல்லாம்
சொல்லி முடிக்கையில்

இங்கே இருக்கிறேன் கென் டாடி
உனக்கே உனக்கான பட்டாம்பூச்சி
என்றழைக்கிறாள் செல்ல மகள்
ஜெஸிரா ஃபாத்திமா.

தேவதையின் சிறகுகள்

சிறு பறவையொன்றின் சிறகுகள்
பற்றி சொல்லிக்கொண்டிருந்தேன்
எதுவும் புரியாமல் ஜெஸிரா
பார்த்துக்கொண்டிருந்தாள்
பறவையைத் தெரிய
பறவையாவதைப்பற்றி யோசித்திருப்பாளோ

தேவதைக்கு தெரியாத சிறகுகளா
என்றபடிக்கு விமானம் பற்றி பேச ஆரம்பித்தேன்
விரல் குவித்து வாயிக்குள் திணித்துக்கொண்டு
விமான சப்தமிடத்துவங்கினாள்

செல்ல மகள் ஜெஸிரா ஃபாத்திமா